يا مبتدى الشكوى ومن تنتهي له
استر علينا في جميع الحوالي
استر علينا بالعلوم الجميله
يالواحد العالي على كل عالي
قال الذي مافاه للناس قيله
ابيات عدلات علي ما طرا لي
واعدتني يا جوير حملي تشيله
فرحتني يا ريف ركبا هشالي
الدين عن والدك باغا تحيله
في ذمتك حيثك كبير العيالي
ولا يبرك للحمول الثقيله
الا الزمول وطيبين الرجالي
امك وابوك وغيرهم من تبي له
واخوانك اللي لك حيودا جبالي
ابوك ما والله بايديه حيله
ما عاد يروس حيلة واحتوالي
والناس كلا عارضا في عميله
كلا وراى شيه لساني يلالي
والمال عقب الحال وش ينبغي له
الا تعابيرا لعسر الليالي
والستر خير المال يذكر حصيله
هو الفخر وهو الشرف وهو الجمالي
