كلمات شيلة احذروا التبذير

في ذرى حكامنا اللي تجير المستجير
والعقول مرجحه والسيوف مصقله
ياهل المعروف والراي وش قاعد يصير
العرب في ذا الزمان مشكلتهم مشكله
يا هل الاسراف ما عندكم ذرة ضمير
الكرم لا هو كذيه ولا انتم من هله
يوم جاكم ضيف جبتو من الزاد الكثير
تاخذون الثمن واللي بقى للمزبله
ثم تصبون السمن قدر من فوق البعير
غير دهن العود يوضع بجنب المغسله
احذروا التبذير يا اصحابنا مافيه خير
والبني ادم يحاسب علي ما يفعله
الطلاقه غير ياناس والاسراف غير
من وقع في الثانيه ما يحصل الاوله
قد نقلتواصورة المجتمع عبر الاثير
صورة لاهي جميله ولا هي مجمله
والحقيقه في البلد كم يتيم وكم فقير
بعضهم يتعب ما يلقى طعاما ياكله
كل يوما مقطع يدبل الكبد ويثير
ما دريتوا بان غبر السنين محوله
تجهلون ان الليالي رحاها تستدير
والله اعلم وش تخبي الليالي المقبله
الدول من حولنا في حروب وزمهرير
والمعاصي يمكن انها تلف البوصله